امتااااال شعبية بلا حدود
غسان : ناجي ...شو رأيك بالأمثال الشعبية ؟!
ناجي : (وهو ينظر الى فتاة تمر بجانبه) ، "يا أرض احفظي ما عليكي " ...الأمثال الشعبية ..حلوة ..كتير حلوة !!
غسان : عنجد عم احكي ... هلأ الأمثال طلعت زمان ، وبظروف اجتماعية واقتصادية معينة ، واليوم اتغيرنا يا أخي ، يعني مو شرط تكون صح !!
ناجي : لأ صح ...هلأ أنا مثلاً منحوس ، بتعرف إني منحوس حاكيلك أنا ... يعني والمنحوس منحوس لو علقوا مو برقبتوا فانوس ، لو علقوااا ... وين بدي قلك !! يعني وين ما كان رح يضل منحوس عرفت ...
غسان : لأ مو صح ..أصلاً هاد المثل مشان يحبطك ، بالعكس انت لازم تضل تحاول ، يعني كمان شو بيقولوا : "عصفور باليد أحسن من عشرة على الشجرة " ، أيه لأ سيدي مو صحيح ، يعني حاول تكمش العصافير يلي عالشجرة ...
ناجي : هو بصراحة لازم يكون المثل هيك "عصفور باليد أحسن من عصفور عالشجرة " ، هيك أضمن شي ، أكيد بيكون صح ههههههه .....
غسان : بيطلعلك واحد تاني وبيقلك : "حط راسك بين الروس وقول يا قطاع الروس " ، شو هاد ؟!!
ناجي : واضحة ...يلي حكى المثل يا لحام يا راعي ..
غسان : صح راعي ..سمعان بسياسة القطيع ، هاي سياسة القطيع ...
ناجي : قصدك غريزة القطيع
غسان : المهم فيه راعي وفيه قطيع !!
بعدين شوف التناقض يا معلم ...يعني بتحس الأمثال الشعبية مخانقة :
- "لا تؤجل عمل اليوم الى الغد"
- شو ؟!! كيف لا تؤجل ..."في العجلة الندامة وفي التأني السلامة " ، طول بالك ولا تتسرع
- حبيبي "دق الحديد وهو حامي " ، شو عم قلك أنا ...
- لك "شو لاحقك بعصاية " لعمى بعيونك هدي شوي ...
يعني كل واحد بيخترع أمثال على كيفو !!
ناجي : أيه والله صح ، كمان أكثر من أمثال السب والشتم ما في : "آل يا مآمنة بالرجال متل المية بالغربال " ، شو بيرد عليها : "المرأة كالحرباء تتلون كما تشاء "، وعن جديد طلعوا مثل بالسعودية : "السيارة مفسدة النساء" ، بس يا أخي نحكي الحق ، يعني كمان بيقولوا : "وراء كل رجل عظيم امرأة " ...
غسان : حبيبي بلا حق بلا بطيخ ... أول شي ليش وراء ؟! ليش فيك تفهمني ليش ؟.. لك يا أخي اذا العقل الشرقي ما بيتحمل أمام ، فيعني على الأقل بجانب لانو المرأة اليوم شريك للرجل ، بعدين ليش صفة العظمة بس للرجل ، والمرأة من "الخلف " لازم تضل تخدمه لحتى يوصل للعظمة !! ...ليش ما تخدم حالها وهيه توصل للعظمة ..؟!
ناجي : هلأ بلا فلسفة زايدة ، لعمى والله ما بعرفك مفذلك لهدرجة ..
غسان : هلأ هي فذلكة ؟!!
ناجي : طبعاً ، صحيح متل ما بيقولوا "يلي ما بيعرفك بيجهلك " ...
غسان : أكيد هاد آخر مثل اخترعوا ، يعني بتحس انهن كانو ا قاعدين لا شغلة ولا عملة راحوا اخترعوا ، لك بالله شو الو طعمة هالمثل آل "يلي ما بيعرفك بيجهلك" ، ما هوه يلي ما بيعرفك أكيد رح يجهلك ، أساساً كيف بدو يجهلك اذا بيعرفك أكيد ما بيعرفك ... لك وعلى فرض عرفك أيه معناها ما رح يجهلك لانو بيعرفك ...عرفت كيف ؟!!
ناجي : أيه عرفت ...
غسان : دير بالك ... لانوا ذا ما عرفت ...بتجهلك !!!
امتاااال شعبية بلا حدود 
