ليلى وزئب بلهجات السورية
الحلبيه
ليلى ماشية بالغابة بنص الليل ورايحة لعند نانتا مثل في كل الحكايات !
والذئب ( المسكين ) وقفها لليلى وسألها لوين رايحة يا ليلى ؟ !
وردت عليه ليلى : وانت اش دخلك ولاك بهيم ... اش عبتساوي هون بنصاص الليالي؟؟؟ وليش عبتسألني لوين رايحة ؟؟ ولي عليك حيوان ..ان شاء الله بتعفسك سيارة بلا نمرة وبلا شوفير يا رزيل يا مبهدل يا قليل الحيا ما عندك خوات كنّي ... تفو عليك ....
ومسكت ليلى الذئب من ادنو وشلفتو 7 متار وتابعت المسير لعند نانتا !!!
هون .. الذئب لقاها كبيرة كتير بحقو وقال لحالو: هلق بنت فصعونة مابتطلع بطول إجري تشرشحني هيك بفصط الغابة قدام الحيوانات الرايحة والجاي وأنا الذئب ضروب وطراح !!!!!!!
طيب يا ليلى .. إذا ما بفشخ حنكك
المهم يا سادة يا كرام .. راح الذئب أخد تكسي وطيران على بيت نانتا لليلى مشان يصل قبلا ..
دق الجرس .. قامت سألت العجوز اللي ورا الباب : مينو هاد عبيدق علي الباب ؟جاوب الذئب : أنا ليلى .. افتحيلي نانا.
وأول ما فتحتلو الباب اطّلع فيها بنظرة شريرة من طرف عينو وقلا : يبلاكي بقتلك شأدّك جدبة مين ما قلك انا ليلى بتفتحيلو .. لكن شلون بيقولو عليكي ذكية وحربوقة ؟؟وركد وراها من غرفة لغرفة من غرفة لغرفة وهي عبتصييح وتولول ...
وكل ما تجي بدها تفتح تمها لتحكي يجرقها الذئب بالكف على بوزا ... وبالأخير حصرا بزاوية القوضة وقلها حاج تبعقي ختيارة الجن .... وأكلا.
وفي نفس اللحظة أنفتح باب الأصنصور وظهرت ليلى وقد سمعت ولاويل وعياط صادرة من البيت .. وباب صقاق مفتوح فـنطت نط لجوا البيت وشافت الذئب بعدما أكل الجدة المسكينة ..
فخاطبها الذئب مستهزئاً : ديه ورجيني إش دا تعملي هلق .. ههههههههههههه
وردت عليه ليلى وقد تطاير الشرر من عينيها : إيه انا اللي بورجيك ياصقاقي يا لقلوق ..
واستلت ليلى من تحت البلوزة على خصرها شنتيانة بطول 20 سم وشركت الذئب وقطعت أوصاله حتى خرجت نانتها من بطن الذئب .
وهنا كانت المفاجأة حين صرخت ليلى : نانااااااااااا ... لعمى أنتي مانك نانتي!!! .. مينو انتي وأش عبتساوي هون ؟؟
وأجابت العجوز بدهشة : عرفتك . موأنتي ليلى بنت بنت جارتي أم عبدو اللي بالطابق الرابع؟ فأجابت ليلى متسائلة : ليش نحن بإينا طابق ؟ وردت العجوز : هاد الطابق التالت ... بس الأصنصور متشرك وبدال ما يطلع عالطابق الرابع عبيوقف بالطابق التالت ..
فأجابت ليلى معتذرة : ييه عدم المؤاخذة حجة .. بس ما أكون أزعجتك ..
مزبوط أنا ليلى وجيت عند نانتي .. بس معناتا كل الحق عالأصنصور ... كرمال النبي ماتواخذيني حجة .. وهلق بنضفلك البيت وبساويلكياه متل الليرة .
وقامت ليلي بتنظيف البيت من جثة ودماء الذئب ووضعتها في كيس الزبالة وشلفتو من عالبلكون (حفاظاَ على التقاليد المتبعة )
وبعدين أخذت ليلى سلتها ودخلت المصعد متوجهةً لبيت نانتا ..
وتوتة توتة .. خلصتالحتوتة

شرح المفردات الحلبية للأخوان من باقي المحافظات:
نانتا: جدتها.
إش دا قلك: للاستفهام وتعني ماذا سوف أقول لك تقابلها بالشامي ( شو بدي قلك ).
بتعفسك: أي تدوسك.
كني: على ما يبدو.
بفصط: بوسط.
ديه: صعبة الترجمة ولكن على حسب مافهمت من الحكاية تعني الطلب للقيام بأمر ما والحث عليه.
مثال عن جملة فيها كلمة ديه: ( ديه خلينا نروح تأخرنا خيو ).
إشقدك: كم أنت.
بوزا: فمها.
تبعقي: تصرخي بصوت عال ومرتفع.

ــــــــــــــــــــــــــ
الشاامي

كان يا مكان في سالف العصر والأوان كان في وحدة اسما "ليلى "
وفي يوم من الأيام اجت امها لليلى وقالت: ليلى ى ى ى لك وينك يا ليلى ى ى لك وين رحت يا مأصوفة الرأبةااااااا .
وبسرعة نطت ليلى وقالت : اي يامو شو بتريدي!!!؟؟؟
قالت الام : لك ولي شو وينك ولك مشخوتة انشأ حلئي من كتر ما عيطت
قالت ليلى: كنت عم اشطف أرض اديار يامووو .
فقالت الام: يلا خلصي يلي بأي ي د ي ك وروحي خدي هل الاكل لعند ستك بالغوطةاااا حرام هلأ بتكون خورت من الجوع!؟!
فقالت ليلى : يلا يامووو سواني بس لدك ملايتي وبصير جاهزة.
وهي على طريق الغوطة كان في ذئب كبير وبخوف آم شاف البنت يلي لابسة ملاية وبسرعة نطلا وآل :
- لك وين رايحة يا ليلى!!!؟؟؟
فآلت : شو دخلك ولا أزعر شو بدك فيني وين رايحة ووين جاية !!!!!!!؟؟؟ فعلا انك أليل أدب وما عندك زوء ,شو ما عندك اخوات بنات اتخاف عليهن لك امأواص !!!!!!!!!!!! إنئلع من وشي أبل ما لم الناس عليك لكتفو عليك واحد ما مو مربا.
فخاف الذئب من الفضيحة وهرب بس من كتر مالو مشيطن عرف انو ليلى رايحة لعند ستى "لانو هيك الإصة بتؤول"
فراح لبيت ستى لليلى يلي ما في غيرو على الطريء يلي رايحة منو البنت
وراح ودأ الباب!!؟
طج طج طج طج طج
قالت ستها لليلى: مين عم يدئ الباب
-قال الذئب :انا الداية ام زكي افتحي !؟
- فقالت الختيارة بعصبية وبصوت عالي :ولي ام زكي إلك عين تيجي بعد الفصل يلي عملتي مبارح فعلا انك وقحة!!!!؟
- قال الذئب باستغراب : أ ه !!!؟؟ لك جي ي ي ت لك جيت لحتى صالحك لك افتحي خلصيني شلأت الناس علي
- قالت الختيارة باستغراب :بدك تصالحيني بعد كل شي ساويتي ولك مشخوتة!!!!!!!!!!؟؟؟
- أااا !؟؟!لك يبعتلك حمى اي!؟! افتحي منتفاهم جوى لك بس افتحي ي ي ي
وفتحت الختيارة الباب ززززززززززززي ي ي ي ي ي ي إ إ إ إ إ
- قال الذئب :العمى يضرب جوز عيونك سنة لحتى تفتحي ولك محورأة !!!؟؟؟
- فقالت الختيارة: يي لعمى لك ليش هيك البة وشيك!!؟؟
- قال الذئب :لك جدبة انشالله سدأت اني ام زكي انا الذئب
وإز راحت ستها لليلى تصيح وتولول وهو يركض وراها من أوضة لأوضة ومن ارض ديار لبيت المونة وبعد جهد كبير حصرا بالزاوية وقال:
- يبعتلك أتلك انشالله تكسرت اركابي وانا عم اركض وراكي .
وهو بدو ياكلا وإز بينفتح الباب وبتفوت البنت وتقول:
- ولا حمار شو جابك لهون شو ما اتربيت من اول مرة لسا؟؟؟؟!!!!!
- قال الذئب بثقة :اجيت آكل ستك يا ليلى شنو هيك مكتوب بالإصة !!!!؟؟؟؟؟
- قالت البنت باستغراب :ليش مين ألك إنو أنا ليلى بالأصل يا محورأ!!!!!!!!!؟؟؟ .
وفي لحظة صمت واتت الصدمة وقال : آآآآآآآآ شششششوووو ليش مو انت ليلى!!!!!!!!!؟؟؟؟؟؟؟؟ انشالله ما تواخزينا إختي استري ما شفتي منا !!!!!!!!!!!!!!!!!!!.
" وطلع الذئب من البيت مألع وبهدل ووصلت ليلى الحقيقية لعند ستى بس ما لإتها شنو كانت مضيوفة عند خالا ورجعت ليلى لبيتا مأفوشة وعم اتخانئ دبان وشى"
وتوتة توتة خلصت الحتوتة حلوة ولا مبهدلة وفتفوتة؟؟؟!!!! " بتهمني ردودكن هه"

ـــــــــــــــــــــــــــــــ

النسخة الشامية : من تأليفي
كان يا مكان بأديم الزمان وسالف العصر والأوان كان في صبية اسمها ليلى ساكنة بحارة الضبع وبيوم من زات الايام اجت امها لليلى حاملة بايدها مطبئية وقالتلها : وينك يا ليلى لك ردي وين رحتي يا مأصوفة الرأبة يبعتلك حمى شو الك غطات .وبسرعة أنهت ليلى المحادثة على شباك الجيران مع بنت الجيران فتحية وبعدين ردت على أمها : نعم يامو؟ شحني هون شو بدك؟؟؟
قالت الام : لك ولي شو وينك ولك مشخوتة انشأ حلئي من كتر ما عيطت
ليلى كزبت وردت على أمها :كنت عم اشطف أرض الديار يامووو .
فقالت الام: يوووو ما شالله حولك دأتك الفلاحة على غفلة؟ اتركي هلأ من ايدك وروحي دكي ملايتك وخدي صحن هالحراّء بأصبعو لعند ستك بالغوطة , حرام هلأ بتكون غوطنت من الجوع , ولا تتطلعي هيك ولاّ هيك وأنتي بالطريق , عيونك بالأرض والله اذا بيدرى أبوكي أنك اتطلعتي بابن الخضري أبو فياض ليشختك عالبلوعة
فقالت ليلى : لاءا يامو شو أتطلع ما أتطلع عيب يامو عيب يي شو هالحكي .
وهي على طريق الغوطة كان في ذئب كبير وبخوف آم شاف ليلى وهيي عم تمشي مع ابن الخضرجي أبو فياض بالغوطة , لطالها الذئب ورا الشجرة عم يستنى ابن الحجي أب فياض ليروح , ولما ودعها وصفت ليلى لحالها هوووووووووووون نط الديب :
شوووووو وين يا مهوّن؟ شو مطلعك من بيتك من أبل الشحادة وبنتا؟
فآلت : شو دخلك ولا أزعر ولك يخرب بيتك شو كتير غلبة بحطوك بالصدر بلاقوك بالعتبة , شو بدك فيني وين رايحة ووين جاية , العمى شو أليل أدب وما عندك زوء ,شو ما عندك أهل يضبوك؟ إنئلع من وشي أبل ما أصرخ صوت ولم الناس عليك لك تفو عليك شو بلا ترباية أليل الأدب طويل الدنب من هون لحلب
لما سمع الديب تهديد ليلى خاف من الجرصة وانألع بس هالمرة لطالها مرة تانية ورا الشجرة وراقبها من بعيد قام لقاها ردت شافت ابن الحجي أب فياض وبلشوا يعدو يوتوتوا ورا هديك الشجرة
هون لقاها اجت على رجليها للشغلة وقال لحالو هلأ بسبئها لعند ستا وبلطيلا هونيك وباكل التنتين سوا لحتى علمها ترفع صوتها عليي هالمأصوفة الرقبة
وفعلاً صاحبنا ما كذب خبر وراح لعند ستا لليلى قام لقا باب الصقاق مفتوح لأنو ستا لليلى سمعها أليل مشان هيك بتتركو مفتوح دائما
فات شوي شوي شوي شوي على روس أصابيعو واتسلل على أرض ديار واتخبى بالديوان
ستا لليلى كانت لابسة هالغطا الأبيض والخراطة وعم تصلي بالمربع وما شافت الديب يلي كان مستني ليلى على أحر من الجمر مشان ياكلها هيي وستها
هلأ ما سمع على غفلة غير ليلى فاتت وخبطت الباب برجلها هديك الخبطة لأنو كانت معصبة لأنها اتخانقت مع فياض اللي ما كان هاين عليه يتركها تمشي لحالها بالغوطة لأنو الفرنسي كان محاصر الغوطة من كل أرنة
ارتعب الديب من صوت خبطة الباب وقال لحالو "الله لا كان جاب البلا واجيتي والله جابك يا أم اللول"
فاتت عم تصرخ على ستا بأعلى صوت مشان تسمعا
تيتااااااااااااااا
ولك يا تيتاااااااااااااااااا
شو وينك
أريضة شو سمعك تقلان
وهيي عم تمشي بكل براءة شهقت هديك الشهقة !!!

هيييييييييييييييييييي
يووووووووووووووه الواه الواه عليك
لاحقني لهون يا مأوص

ولييييييييييييي
ولك الحؤوووونيييييييييييييي



ومن سمع؟
وهيي عم تنادي وتستنجد يا عالم يا ناس يا هوه وإذ بفياض ابن أب فياض يلي كان لاحئها (ناءزو ألبو من هالنهار) كان لاطي ورا باب ستا
ولما سمع الصوت ما اتحملوا عألاتو
دغري دفش الباب بكوعو وفات أتل الديب بالعصاية الخيزران
وبعدين ليلى اتشكرتو واتصالح هو وياها وتاني يوم بعت أمو والداية أم زكي وراحوا طلبوا ايدها لليلى واتجوزوا وعاشوا حياة سعيدة

وتوتة توتة خلصت الحتوتة

ـــــــــــــــــــــــــــــــ


النسخة الساحلية اللاذقانية :
ملاحظة : الحرف "ق" يقرأ قاف وليس ئاف
كانت ليلى متمشي بالغابة بين شجرات الزيتون ,وكانت فرحانة متفط رعوش رعوش ...مشلوشة وشعرا منكوش .. وشوك الديس بديّاتا ... معلم من مرش العرموش ,
قامت شافت الديب ..
قالتله : ولاااااه قرد شو متعمل عندك ,
قلا : بالله قيعيد مشرب متة و ناطر بنت المدرسة مستنّي ... واقف على البوّابة عاينها ,
فمسكت المنجل ورقعت صوت : سمرا وانا الحاصودي ,
ردوا خياتا : جايين نسنبل وراكي ...
قام الديب صرخ : وااااااعيني ... وااااقلبي ..... حوشي خياتك حوشي ,
وراح يركيد وهني ليحقينه
هيك هيك بمرقة بيّا أبو تالا , قام ركض وراهين للبنيات ميقلن ارجعوا عالبيت هلق بقوصو للذيب والذيب لما سمع أنو القصة رح يصير فيها ضرب وقواص قال لحالو خيي ننفد بريشنا وبلالنا هالعلقة , وهيك طفش خيكون الذيب من الضيعة وعاشت ليلى بأمان وسلام

ــــــــــــــــــــــــــــ

ههههههههههههههههههه

ههههههههههههههههههههههه

هههههههههههههههههههههههههههه

هههههههههههههههههههههه

ههههههههههههههههه


والله حانشل من كتر الضحك يعلى شيطانك شو مئنكلة انك .. يحرق حريشك

بس جد حلووووووووووووووووة

لك يسلمهن ربــــــي

ههههههههههههههههههههههههههههههههههههه
ههههههههههههههههههههههههههههههههههههههههههههه
هههههههههههههههههههههههههههههههههههههههههههههههههه ههههه


يبعتلك الهنا يارب

والله فرطيني من الضحك واكتر شي الحلبي ههههههههههه


مشكورة